شاعر: ازہر ندیم 

راوی و پروڈیوسر: سجاد احمد بری

صدابندی وتدوین:  ذوالفقار احمد شاد

یشکش:  ریڈیو پاکستان بہاولپور

دعا کے لفظ روشن ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔

وبا کے دھیان میں بیٹھے جہاں کے غمزدہ لوگو

دعا سے ایک ساعت پہلے یہ جانو

یقیں باطن کی شمع ہے

یقیں انسان کے داخل میں جب بھی جھلملاتا ہے

ضیاۓ بزم بڑھتی ہے

ہر اک منظر عجب تابانیوں سے جگمگاتا ہے

یقیں پہلا قرینہ ہے سفر آغاز کرنے میں

یقیں وہ راستہ ہے جو فتح کی سمت جاتا ہے

اے میرے دل فگار و غم زدہ لوگو

یہ پل جو آزماٸش ہے اسے کچھ بانٹ لو ایسے

یقیں سے خود کو یوں بھر لو

کہ جیسے سرخروٸ ہی فضاٶں کا مقدر ہے

ازل سے تا ابد اک سلسلہ ہے ارتقاٸ یہ

ہر  انساں ہے یہاں پر دوسرے کے درد کا درماں

وبا ،افلاس ، بیماری سبھی ہم مل کے جھیلیں گے

اگر یوں ہے تو پھر دیکھو

ہمارے آسمانوں پر

دعا کے لفظ روشن ہیں